Íslenskupróf vegna umsóknar um íslenskan ríkisborgararétt hefjast næst hjá Námsmatsstofnun 30. nóvember næstkomandi fyrir þá sem hafa skráð sig í próf fyrir 10. nóvember. Þeir sem skrá sig eftir þann tíma eiga kost á því að taka próf vorið 2010. Prófin verða haldin í Reykjavík og utan höfuðborgarsvæðisins ef næg þátttaka fæst.
Íslenskupróf fyrir umsækjendur um íslenskan ríkisborgararétt var haldið í fyrsta sinn í júní síðastliðnum en 1. janúar 2009 tók gildi það ákvæði í lögum um íslenskan ríkisborgararétt að umsækjandi skuli hafa staðist próf í íslensku. Alls tóku þá 206 umsækjendur próf sem haldið var bæði á höfuðborgarsvæðinu og á Akureyri. Dóms- og kirkjumálaráðuneytið hefur falið Námsmatsstofnun að sjá um framkvæmd prófanna og að mati stofnunarinnar tókst framkvæmdin í júní að flestu leyti vel.
Skráning í prófin hefst 15. september nk. og fer hún fram með rafrænum hætti á vef Námsmatsstofnunar, www.namsmat.is. Þar er einnig að finna nánari upplýsingar um hvar prófin fara fram, sýnishorn af verkefnum og prófkröfur. Einnig eru veittar upplýsingar í síma 550 2400. Gjald fyrir þátttöku í prófi er 7.000 krónur.
Auglýsing um próf í íslensku fyrir umsækjendur um íslenskan ríkisborgararétt (pdf-skjal) (Sótt af vef Dóms- og mannréttindaráðuneytisins)
