Fræðslunet Suðurlands

Námskeiðið Gerð styrkumsókna sem halda átti á fimmtudaginn  verður haldið í kvöld mánudag. Allir velkomnir.

Mánudaginn 1. mars kl. 20 verður haldið námskeið í boði Menningarráðs Suðurlands og Fræðslunetsins sem kallast ,,Gerð styrkumsókna". Námskeiðið verður haldið í Iðu og er öllum heimill aðgangur. Kennari er Dorothee Lubecki, menningarfulltrúi Suðurlands.

Lýsing:

Námskeiðið er sérstaklega hugsað fyrir þá sem hyggjast sækja um styrki úr hinum  ýmsu sjóðum.  Á námskeiðinu fá þátttakendur leiðbeiningar um hvernig æskilegt er að byggja umsóknir upp og ganga frá þeim, hvaða fylgiskjöl og útreikningar þurfa að fylgja umsóknum og fl. Einnig fá þátttakendur kynningu á nokkrum sjóðum sem veita styrki til menningarstarfs. Þeir sem hafa hug á að sækja um styrki til Menningarráðs Suðurlands er sérstaklega bent á að nýta tækifærið og sækja þetta námskeið.

Frá afhendingu styrks Vísindasjóðsins

Árleg úthlutun styrks úr Vísinda- og rannsóknarsjóði Fræðslunets Suðurlands fór fram á hátíðarfundi Fræðslunetsins sem haldinn var föstudaginn 12. febrúar sl. Tvö verkefni hlutu styrkinn að þessu sinni. Meistaraprófsverkefni Guðrúnar Þórönnu Jónsdóttur  sem fjallar um tengsl og samstarf leik- og grunnskóla í Árnessýslu með tilliti til lestrarnáms ungra barna. Markmið verkefnisins er að bæta lestrarnám nemenda á yngsta stigi og að fagfólk í leik- og grunnskólum verði betur meðvitað um samfellu í námi barnanna og þar sem mikilvægi samstarfs leik- og grunnskóla. Guðrún Þóranna fékk 500.000 kr. styrk til verksins. Hún er nemandi á menntavísindasviði Háskóla Íslands.

Í öðru lagi fékk B.S. verkefni Sigurðar Torfa Sigurðssonar „Hófar og hæfileikar“ 300.000 kr. styrk. Verkefnið felst í því að bera saman hófa og járningar hrossa sem mæta til kynbótadóms og hófa og járningar almennra reið- eða keppnishesta. Tilgangurinn er m.a. að skoða hvort form, lengd og halli hófa og kjúku hafi áhrif á ganghæfileika íslenska hestsins. Sigurður Torfi er nemandi við Landbúnaðarháskóla Íslands.

Það var forseti Íslands herra Ólafur Ragnar Grímsson sem afhenti styrkinn að venju en þetta er áttunda árið sem styrkur er veittur úr sjóðnum. Alls bárust fimm umsóknir að þessu sinni en það eru þó nokkuð færri umsóknir en undanfarin ár. Það eru ýmis fyrirtæki, sveitarfélög, stofnanir og félagasamtök á Suðurlandi sem eru bakhjarlar sjóðsins.

Við sama tækifæri voru Menntaverðlaun Suðurland afhent. En það var Flúðaskóli sem fékk þau verðlaun fyrir verkefnið Lesið í skóginn. Þetta er í annað sinn sem Menntaverðlaun Suðurlands eru veitt en það var Fræðslunetið sem fékk þau verðlaun síðast.

Hátíðarfundur Fræðslunets Suðurlands verður haldinn í dag kl. 17. Þar mun forseti Íslands, herra Ólafur Ragnar Grímsson afhenda styrk vísinda- og rannsóknarsjóðs Fræðslunetsins. Styrkurinn er veittur árlega og geta þeir sem stunda nám á háskólastigi sótt um styrk til gerðar lokaverkefna. Skilyrði er að verkefni tengist Suðurlandi með einhverjum hætti. Hægt er að skoða hverjir hafa hlotið styrk vísindasjóðsins og hvaða verkefni, frá því að hann var stofnaður árið 2002 (skoða).

Menntaverðlaun Suðurlands

Á hátíðarfundinum verða einnig afhent Menntaverðlaun Suðurlands. Það er mennta- og menningarmálanefnd SASS sem veitir þessi verðlaun. Verðlaunin voru afhent í fyrsta skipti haustið 2008 en þá hlaut Fræðslunetið verðlaunin. Nú eru verðlaunin afhent í annað sinn og samkvæmt vefsíðu Hrunamannahrepps er það Flúðaskóli sem hlýtur verðlaunin að þessu sinni.

Námskeiðið Jákvæð sálfræði sem haldið verður næstu tvo fimmtudaga virðist höfða sérstaklega til Klausturbúa en þar verður mjög góð þátttaka. Námskeiðið verður sent þangað í fjarfundi og þess vegna opnast möguleikar á að senda einnig á aðra staði á Suðurlandi, s.s. Vík, Hvolsvöll og Flúðir. Þeir sem hafa áhuga á námskeiðinu geta innritað sig næstu daga í síma 4808155. Skoða auglýsingu um námskeiðið.