Fræðslunetið

Starfsemi Fræðslunetsins á vorönn hefur gengið vel og hafa verið haldin bæði löng og stutt námskeið af ýmsum toga fyrir breiðan hóp viðskiptavina. Alls voru haldin 42 námskeið á vorönn og voru nemendur á þessum námskeiðum alls 472 eða ríflega 11 að meðaltali. Nemendastundir eru 18.008 en það er kennslustundafjöldi margfaldaður með nemendafjölda. Kennarastundir voru 1481. Miðað við vorönn 2009 er um talsverða aukningu á starfseminni að ræða og eru nemendur nú tæplega 100 fleiri en á sama tíma í fyrra.  Mesta breytingin er þó sú að nú eru kennd fleiri námskeið sem eru mun lengri en áður gerðist. Sem dæmi má nefna að sl. vetur vour þrjú námskeið kennd sem voru 300 stunda löng en það eru lengstu námskeið sem Fræðslunetið hefur haldið til þessa.

Veffréttabréf Fræðslusetursins Starfsmenntar fyrir maí 2010 er komið út. Starfsmennt er endurmenntunarvettvangur fyrir starfsmenn ríkis- og sveitarfélaga. Skoða fréttabréfið.

Þó nú sé loks vor í lofti erum við hér á Fræðslunetinu aðallega að hugsa um næstu haustönn. Það verða mörg ný námskeið í boði næsta haust. Fyrst ber að nefna að í lok ágúst höfum við skipulagt námskeið í nýtingu og tínslu íslenskra villisveppa. Námskeiðið verður í tvö skipti og í seinna skiptið verður farið í skógarferð þar sem þátttakendum gefst færi á að taka fjölskylduna með í sveppatínsluferð undir leiðsögn. Mörg handverksnámskeið er fyrirhugað að halda, s.s. leðurtöskugerð, mósaiknámskeið,  keramiknámskeið og framhaldssnámskeið í teikningu. Námskeiðin birtast hér á vefnum jafnóðum og búið er að skipuleggja þau. Kíkið á það sem þegar er komið hér. Þá er í bígerð að bjóða kvöldskóla fyrir fullorðna sem heitir Grunnmenntaskólinn. Hann er hugsaður fyrir þá sem hyggjast hefja nám að nýju, kannski eftir langt hlé. Reiknað er með að kennt verð þrjú kvöld í viku. Grunnmenntaskólinn verður auglýstur nánar síðar.

Skoða auglýsingu

Fjölbrautaskóli Suðurlands og Fræðslunet Suðurlands ásamt Iðunni fræðslusetri (fræðslumiðstöð iðnaðarins) og Fræðslumiðstöð atvinnulífsins boða til kynningarfundar um raunfærnimat í húsasmíði í Iðu (nýtt íþrótta- og kennsluhúsnæði Fjölbrautaskóla Suðurlands), Tryggvagötu 25 á Selfossi, mánudaginn 10. maí kl. 20.

Þeim, sem hafa unnið við húsasmíði í að minnsta kosti 5 ár og eru orðnir 25 ára, býðst nú fyrstum allra á Suðurlandi raunfærnimat. Raunfærnimatið er ætlað þeim

1. sem uppfylla ofangreind skilyrði og hafa einhverntíma byrjað nám í húsasmíði en ekki lokið
2. sem uppfylla ofangreind skilyrði þó þeir hafi ekki stundað skólanám í iðngreininni

Matið getur jafngilt einingum í námi.

Raunfærnimat er staðfesting og mat á raunverulegri færni einstaklings án tillits til þess hvernig eða hvenær hennar hefur verið aflað. Allir sem fara í raunfærnimat fá góða aðstoð fagfólks. Matið er ókeypis. Raunfærni er samanlögð færni sem einstaklingur hefur náð í lífinu, svo sem með starfsreynslu, starfsnámi, frístundanámi, skólanámi, félgagsstörfum og fjölskyldulífi. Með raunfærnimati fæst viðurkennd staðfesting á raunfærni einstaklings þannig að hann þurfi ekki að sækja nám í því sem hann kann. Þannig styttir raunfærnimat skólanám þeirra sem eru metnir ef þeir hugsa sér nám í húsasmíði í þessu tilviki.

Nokkur reynsla er komin á raunfærnimat í nokkrum iðngreinum á Íslandi frá því Fræðslumiðstöð atvinnulífsins var falið að þróa aðferðir við matið. Iðan fræðslusetur hefur haldið utan um mörg þessara verkefna og hefur því reynslu af því að stýra þeim. Sömuleiðis hafa náms- og starfsráðgjafar Fjölbrautaskóla Suðurlands og Fræðslunets Suðurlands ásamt fagkennurum Fjölbrautaskólans undirbúið sig sérstaklega fyrir verkefnið. Það er okkur metnaðarmál að ná til sem allra flestra á Suðurlandi sem þetta á við um. Aðferðin við raunfærnimat er viðurkennd af hagsmunaaðilum og menntayfirvöldum á Íslandi og er þátttakendum að kostnaðarlausu.